Святкаванне завяршэння жніва мае глыбокія векавыя карані і ўслаўляе дзве вялікія каштоўнасці: чалавека-працаўніка і нацыянальную культуру. Каб дзеці маглі з ранняга дзяцінства ведаць пра сваю краіну, пра яе працавіты народ, умелі шанаваць беларускія народныя традыцыі ў ДУДА "Дзіцячы садок №15 г. Баранавічы" правялі фальклорную музычную квэст - забаўку “Дажынкі”.
Гэта было сапраўднае свята, якое суправаджалася танцамі, песнямі, карагодамі, цікавымі беларускімі гульнямі. Галоўны атрыбут “Дажынак” - гэта сноп. Выхаванцам было цікава даведацца аб тым, што ў апошніх каласах хаваецца дух поля, каб ён і на наступны год захоўваў, памнажаў ураджай, яму прысвячалі апошні сноп.
Царыца палёў пазнаёміла дзяцей са старажытным народным абрадам - "Завіванне снапа", расказала, што ў народзе першы сноп называўся "барада", яго ўпрыгожвалі яркімі стужкамі і захоўвалі ў чырвоным куце хаты да новага ўраджаю.
Свята атрымалася на славу! Гасцямі фальклорнага свята сталі Гаспадыня, Царыца палёў, якія разам з выхаванцамі адправіліся на пошукі каравая. На станцыях яны сустрэлі Мышку, Каласка, Печку і Крата з якімі гулялі ў гульні «Упрыгожваем каравай», «Хто хутчэй збярэ каласы?», «Хто хутчэй завязе збожжа на элеватар?” і інш.
У гульнявой дзейнасці дзеці вучыліся беражліва ставіцца да хлеба і паважаць працу хлебароба.
Дзякуючы такім мерапрыемствам дзецям прывіваюцца лепшыя духоўныя традыцыі, любоў да роднага краю, роднай зямлі.